रास्वपा बागलुङको सभापतिमा ढालेन्द्र रायमाझी निर्वाचित

रेडियो गलकोट
१६ श्रावण, २०८३

राष्ट्रिय स्वतन्त्र पार्टी (रास्वपा) बागलुङको जिल्ला सभापतिमा ढालेन्द्र माझी निर्वाचित हुनु भएको छ । निकटतम प्रतिद्धन्दि पुनम शर्मालाई ११ मतान्तरले पराजित गर्दै माझी सभापतिमा निर्वाचित भएका हुनुभएको हो ।

शनिबार सदरमुकाम बागलुङ बजारमा भएको अधिवेशनमा शर्माले ८२ मत प्राप्त गर्दा माझीले ९३ मत पाएर विजयी हुनु भयो । उपसभापतिमा खिमानन्द पौडेल ९९ मतसहित विजयी हुनुभयो। उहाँका प्रतिस्पर्धी देबु जंगले ७५ मत प्राप्त गर्नुभयो । सचिवमा लिलबहादुर (बाबिन) खत्री १११ मत प्राप्त गर्दै निर्वाचित हुनुभयो । उहाँका प्रतिस्पर्धी प्रकाश रिजालले ६५ मत प्राप्त गर्नुभयो ।

त्यसैगरी सहसचिवमा बालकृष्ण शर्मा ८८ मत प्राप्त गर्दै विजयी हुनुभयो । उहाँका निकटतम प्रतिस्पर्धी कमल प्रसाद खरेलले ८५ मत प्राप्त गर्नुभएको थियो । सहसचिव पदमा तीन मतको झिनो अन्तरले शर्मा विजयी हुनुभएको हो । यस्तै, क्षेत्रीय सदस्य (क्षेत्र नं. १) मा रामप्रसाद अधिकारी १०२ मतसहित निर्वाचित हुनुभयो । उहाँका प्रतिस्पर्धी यम कुमार मल्लले ६८ मत प्राप्त गर्नुभयो । क्षेत्रीय सदस्य (क्षेत्र नं. २) मा हिमाल खत्री ९७ मतसहित विजयी हुनुभयो । उहाँका प्रतिस्पर्धी कृष्ण बहादुर नेपालीले ७४ मत प्राप्त गर्नुभयो ।

२०८३ जेठ २३ गते गलकोटमा भएको प्रथम जिल्ला अधिवेशनबाट पुनम प्रसाद शर्माको नेतृत्वमा जिल्ला कार्यसमिति घोषणा भएपछि अर्का अध्यक्षका आकांक्षी ढालेन्द्र रायमाझी पक्षले अधिवेशनस्थलमै विरोध जनाएका थिए । केन्द्रमा प्रक्रियाको विषयमा उजुरी परेपछि केन्द्रीय निर्वाचन आयोगले बदर गरेको थियो ।