गलकोट नगरपालिकाद्धारा दर्ताबिना सञ्चालनमा रहेको पसल बन्द

रेडियो गलकोट
२० श्रावण, २०८३

गलकोट नगरपालिका वडा नं. ३ हटियामा दर्ताबिना सञ्चालन हुँदै आएका पसलमाथि कारबाही गर्दै एक पसल बन्द गरिएको छ । पटक–पटक व्यवसाय दर्ता गर्न आग्रह गर्दा समेत अटेर गरी दर्ताबिना नै सञ्चालन गरिरहेको पाइएपछि नगरपालिकाले उक्त पसल बन्द गरेको हो ।

गलकोट नगरपालिकाले बजार क्षेत्रको अनुगमनलाई तीव्रता दिँदै व्यवसाय दर्ता, नवीकरण तथा कानुनी प्रक्रियाको पालना भए–नभएको विषयमा निगरानी बढाएको जनाएको छ । अनुगमनका क्रममा वडा नं. ३ हटियामा दर्ता नगरी सञ्चालनमा रहेका अन्य व्यवसायलाई तत्काल दर्ता प्रक्रियामा आउन आग्रह गरिएको गलकोट नगर प्रहरी प्रमुख कृष्ण खत्रीले जानकारी दिनुभयो ।

त्यस्तै, लामो समयदेखि व्यवसाय नवीकरण नगरेका पसल तथा व्यवसायीलाई समेत आवश्यक प्रक्रिया पूरा गरी नवीकरण गर्न नगरपालिकाले आग्रह गरेको छ । पटक–पटकको आग्रहलाई बेवास्ता गर्दै कानुनी प्रक्रिया पूरा नगरी व्यवसाय सञ्चालन गर्ने व्यवसायीमाथि नियमानुसार कारबाही गरिने समेत जनाईएको छ ।

नगरपालिकाले बजार अनुगमनलाई केवल कारबाहीमा सीमित नराखी व्यवसायीलाई आवश्यक जानकारी तथा सहजीकरण गर्दै व्यवस्थित र मर्यादित बजार निर्माणमा जोड दिएको बताएको छ ।

नागरिकलाई सहज, गुणस्तरीय र प्रभावकारी सेवा प्रदान गर्न नगरपालिका प्रतिबद्ध रहेको जनाउँदै बजार व्यवस्थापन, व्यवसायको वैधानिकता तथा सेवा प्रवाहलाई चुस्त बनाउन आगामी दिनमा पनि अनुगमनलाई निरन्तरता दिने जनाएको छ ।